សារព័ត៌មាន​វៀតណាម​ចុះ​ផ្សាយ​ថា រក​ឃើញ​ជនជាតិ​ជប៉ុន​ចេញ​ពី​កម្ពុជា​ផ្ទុកវីរុសកូរ៉ូណា

524

ជនជាតិ​ជប៉ុន​ម្នាក់​ដែល​បាន​ចេញពី​កម្ពុជា​តាម​ព្រលា​នយន្តហោះ​ខេត្តសៀមរាប​ទៅ​ក្រុង​ហូ​ជី​មីញ​ មុននឹង​ផ្ទេរ​ជើង​យន្តហោះ​ទៅ​ប្រទេសកំណើត​ ត្រូវ​បាន​ពិនិត្យ​ឃើញ​មាន​ផ្ទុកមេរោគ​កូ​រ៉ូ​ណា​ថ្មី​ ឬកូវីដ១៩​។ នេះ​បើ​យោង​តាម​ប្រភព​ពី​សារព័ត៌មាន​ក្នុង​ស្រុក​របស់​វៀតណាម​។

យោង​តាម​សារព័ត៌មាន​ Vietnam​ Express​ ចេញផ្សាយ​នៅ​ថ្ងៃម្សិលមិញ​ បានឱ្យ​ដឹង​ថា​ អ្នកដំណើរ​ជា​បុរស​ជនជាតិ​ជប៉ុន​រូប​នោះ​ បាន​ជិះ​យន្តហោះ​ក្រុមហ៊ុន​អាកាសចរណ៍​វៀតណាម​ ចេញ​ពី​ព្រលា​នយន្តហោះ​ខេត្តសៀមរាប​ ទៅ​កាន់​ព្រលា​នយន្តហោះ​ Tan​ Son​ Nhat​ ក្រុង​ហូ​ជី​មីញ​ នៅ​ថ្ងៃ​អង្គារ​ មុន​ពេល​បន្តដំណើរ​ទៅ​ព្រលា​នយន្តហោះ​ Nagoya​ ប្រទេស​ជប៉ុន​ តាម​ជើងហោះហើរ​ក្រុមហ៊ុន​ដដែល​។

ក្រោយពេល​ចុះចត​នៅ​ព្រលា​នយន្តហោះ​ Nagoya​ អ្នកដំណើរ​ដែល​មិន​ត្រូវ​បាន​បង្ហាញ​អត្តសញ្ញា​រូប​នោះ​ បាន​លេច​ចេញអាការៈ​ផ្តាសាយ​ធ្ងន់ធ្ងរ​ ហើយ​ត្រូវ​បាន​ដឹក​បញ្ចូន​ទៅកាន់​មន្ទីរពេទ្យ​ រួច​ក៏​ពិនិត្យ​ឃើញ​មាន​ផ្ទុកមេរោគ​កូវីដ១៩​។

ទោះ​យ៉ាងណា ​រដ្ឋបាល​ខេត្តសៀមរាប​ បញ្ជាក់​ថា​ ខាង​ភាគី​ជប៉ុន​មិនទាន់​បញ្ជាក់​ថា​ ជនជាតិ​ជប៉ុន​ដែល​ចាកចេញ​ពី​កម្ពុជា​នេះ​ មាន​ផ្ទុកមេរោគ​ខូ​វីត១៩ ដូច​ការ​ចុះផ្សាយ​នោះ​នៅឡើយ​។ រដ្ឋបាល​ខេត្តសៀមរាប​៖ «ជប៉ុន​មិនទាន់​បញ្ជាក់​ជា​ផ្លូវការ​ចំពោះ​ជនជាតិ​ជប៉ុន​ថា​កើតជំងឺ​ COVID​-19​ នៅឡើយ​ ហេីយ​អភិបាលខេត្ត​បាន​ចាត់វិធានការ​ស្រាវជ្រាវ​ និង​ត្រៀម​បង្ការ​»។

តាម​ប្រភពសារព័ត៌មានវៀតណាម​ដដែល​ ក្រោយពេល​ទម្លាក់​អ្នកដំណើរ​នៅ​ព្រលា​នយន្តហោះ​ Nagoya​ យន្តហោះ​ក្រុមហ៊ុន​អាកាសចរ​ណ៍វៀតណាម ​បាន​ដឹក​អ្នកដំណើរ៧៣នាក់​ និង​អាកាសយានិក១២នាក់​ ត្រឡប់​មក​ព្រលា​នយន្តហោះ​ Tan​ Son​ Nhat​ វិញ​ នៅ​រសៀល​ថ្ងៃពុធ​។

ក្រុម​អាកាសយានិក​ និង​អ្នកដំណើរ៥១នាក់​ ដែល​ចូល​មក​ប្រទេស​វៀតណាម​ ត្រូវ​បាន​ដាក់​ឱ្យ​នៅ​ដាច់ដោយឡែក​ ឯអ្នកដំណើរ២២នាក់​ផ្សេងទៀត​ដែល​ត្រូវ​ផ្ទេរ​ទៅ​គោល​ដៅ​ផ្សេង​ៗទៀត​ ត្រូវ​បាន​ដាក់​បំបែក​ពី​អ្នកដទៃ​ មុននឹង​បន្តដំណើរ​របស់​ពួកគេ​។ យន្តហោះ​ដែល​បាន​ដឹក​អ្នកដំណើរ​ទាំងនោះ​ ត្រូវ​បាន​ថ្នាំ​បាញ់​សម្លាញ់​មេរោគ​។

រហូត​មកទល់​ពេលនេះ​ ជប៉ុន​បាន​រក​ឃើញ​ករណី​ឆ្លង​មេរោគ​កូវីដ១៩ លើ​មនុស្ស​ចំនួន២៣០នាក់​ ក្នុង​នោះ​មាន​ស្លាប់១២នាក់​ ដោយ​រាប់បញ្ចូល​តួលេខ​ស្លាប់​ក្នុង​កប៉ាល់​ដែល​ចូល​សំចត​នៅ​កំពង់ផែ​ជប៉ុន​។ ចំណែក​ក្នុង​ប្រទេស​វៀតណាម​ បាន​រក​ឃើញ​អ្នក​ឆ្លង១៦នាក់​ ប៉ុន្តែ​ ពួកគេ​ត្រូវ​បាន​អនុញ្ញាត​ឱ្យ​ចេញពី​មន្ទីរពេទ្យ​អស់ហើយ​ បន្ទាប់ពី​ឆ្លងកាត់​ការ​ព្យាបាល​បាន​ជាសះស្បើយ​៕