ទុក្ខជាន់ទុក្ខ! អាគារមន្ទីរពេទ្យសំរាប់ផ្ទុកអ្នកជំងឺCOVID-19 ក្នុងប្រទេសក្រូអាត បានបាក់រលំដោយសារគ្រោះរញ្ជួយ​ដី

1065

កាល​ពី​ម្សិលមិញ​នេះ ប្រទេស ក្រូអាត បាន​ជួប​គ្រោះ​រញ្ជួយ​ដី​កម្រិត ៥.៣ វ៉ិចទ័រ ដែល​បង្ក​ឲ្យ​មាន​ការ​ខូចខាត​ផ្ទះ​សម្បែង អគារ​ពេទ្យ និង​ឡាន​ជា​ច្រើន​គ្រឿង ។ គ្រោះ​រញ្ជួយ​ដី​កម្រិត ៥.៣ វ៉ិចទ័រ​នេះ គឺ​ជា​ការ​ប៉ះពាល់​ខ្លាំង​ក្លា​បំផុត ដែល​ប្រទេស​មួយ​នេះ មិន​ធ្លាប់​បាន​ជួប​អស់​រយៈពេល ១៤០ ឆ្នាំ​មក​ហើយ ។

បើ​តាម​សារព័ត៌មាន BBC បាន​បញ្ជាក់​ថា មនុស្ស ១៦ នាក់ បាន​រង​របួស ខណៈ​ក្មេង​ជំទង់​ម្នាក់​មាន​សភាព​ធ្ងន់ធ្ងរ ក្រោយ​ត្រូវ​ដំបូល​ធ្លាក់​សង្កត់​លើ ។ អ្វី​ដែល​កាន់​តែ​គួរ​ឲ្យ​សង្វេគ​នោះ​គឺ ខណៈ​ខាង​រដ្ឋាភិបាល​ប្រកាស​ឲ្យ​ប្រជាជន​ខ្លួន ស្នាក់​នៅ​ក្នុង​ផ្ទះ ដោយសារ​ការ​ភ័យ​ខ្លាច​នៃ​ការ​រាតត្បាត​ពី​វីរុស COVID-19 ប៉ុន្តែ​ជា​ជួប​ទុក្ខ​ថែម​មួយ​ទៀត ដែល​តម្រូវ​ឲ្យ​ពួកគេ ត្រូវ​បង្ខំ​ចិត្ត រត់​ចោល​ចេញ​ពី​របស់​ខ្លួន ដែល​ត្រូវ​បាន​គ្រោះ​រញ្ជួយ​ដី​វាយ​ប្រហារ​នោះ ។

ក្នុង​នោះ​ដែរ តាម​រូបភាព​មួយ​ចំនួន​ដែល​ថត​បាន និង​ចែកចាយ​លើ​បណ្ដាញ​សង្គម បាន​បង្ហាញ​ឲ្យ​ឃើញ​ពី​ទិដ្ឋភាព​អ្នក​ជំងឺ ដែល​ត្រូវ​បញ្ជូន​ចេញ​មក​ក្រៅ​មន្ទីរពេទ្យ ក្រោយ​អគារ​ពេទ្យ​ទាំង​នោះ ត្រូវ​បាន​ខូចខាត ដោយ​គ្រោះ​ធម្មជាតិ​នេះ ៕

ប្រភព៖ BBC​ / popular