(មានវីដេអូ) ក្តៅៗ!!​ ពេលនេះនគរបាលរាជធានីភ្នំពេញថា​ ជន​ស៊ី​វិល​មួយក្រុម​ដែល​តែងតែ​ចុះ​ចាប់​មនុស្សនៅ​ម្តុំ​បឹង​កក់ មិនមែន​ជា​សមត្ថកិច្ច​ទេ

122

រាជធានី​ភ្នំពេញ ៖ នៅ​រសៀល​ថ្ងៃ​ទី​៤ ខែវិច្ឆិកា ២០១៩​នេះ តាម​រយៈ​ហ្វេ​ស​ប៊ុ​ក​ផេ​ក​ផ្លូវការ​របស់​ស្នងការដ្ឋាន​នគរបាល​រាជធានី​ភ្នំពេញ បាន​ចេញ​មក​បដិសេធ​ថា ជន​ស៊ី​វិល​មួយ​ក្រុម ដែល​តែងតែ​ចុះ​ចាប់​គ្រឿងញៀន នៅ​ម្តុំ​បឹង​កក់​នោះ​មិនមែន​ជា​សមត្ថកិច្ច​ទេ ។​

​ហ្វេ​ស​ប៊ុ​ក​ផេ​ក​ផ្លូវការ​របស់​ស្នងការដ្ឋាន​នគរបាល​រាជធានី​ភ្នំពេញ បន្ត​ថា ប៉ុន្តែ​ទោះជា​យ៉ាងណា​ក្នុង​នាម​ជា​សមត្ថកិច្ច​ទទួលខុសត្រូវ​ក្នុង​ដែនដី​រាជធានី​ភ្នំពេញ នឹង​ធ្វើការ​ស្រាវជ្រាវ បង្ការ ទប់ស្កាត់​មិន​អោយ​ក្រុម​ជន​ស្លៀក​ស៊ី​វិល​ទាំងនោះ​បង្ក​បញ្ហា​ទាំងនេះ​ទៀត​ឡើយ ម្យ៉ាងវិញទៀត​កម្លាំង​នៃ​ស្នងការ​នគរបាល​រាជធានី​ភ្នំពេញ តែងតែ​គោរព​បទបញ្ជា​យ៉ាង​ម៉ឺងម៉ាត់​របស់​ថ្នាក់ដឹកនាំ មិន​ដែល​ទៅ​ធ្វើ​សកម្មភាព​អ្វីមួយ​ដែល​ខុស​ពី​ការ​ណែនាំ ឬ​ក៏​ភារកិច្ច​នោះ​ទេ ។​

​ស្នងការដ្ឋាន​នគរបាល​រាជធានី​ភ្នំពេញ នឹង​ធ្វើការ​សហ​ការណ៍​ជាមួយ​អ​ជ្ញា​ធរ​ពាក់ព័ន្ធ​ទាំងអស់ ដើម្បី​ចាត់វិធានការ​ណ៍​មិន​អោយ​មាន​ករណី​នេះ​កើតឡើង​ទៀត​ឡើយ ។​

ស្នងការដ្ឋាន​នគរបាល​រាជធានី​ភ្នំពេញ​ចេញ​សេចក្តី​បកស្រាយ​បំភ្លឺ​បែប​នេះ បន្ទាប់​ពី​​រឿងរ៉ាវ​រសើប​មួយ​ត្រូវ​បាន​ប្រជាពលរដ្ឋ​និយាយ​ត​គ្នា​ថា បាន​កើត​មាន​ឡើងជា​បន្តបន្ទាប់​នៅ​តំបន់​បឹង​កក់ រាជធានី​ភ្នំពេញ នោះ​គឺ​ករណី​មនុស្ស​មួយ​ក្រុម ដែល​មិនដឹង​អត្តសញ្ញាណ បាន​ធ្វើ​សកម្មភាព​ជិះ​ម៉ូតូ​ល្បាត​ទាំង​យប់​ទាំង​ថ្ងៃ ស្ទាក់ចាំ​ចាប់​មនុស្ស យក​ទៅ​វាយ​ខ្នោះ និង​បង្ខាំង​ជំរិត​ទារប្រាក់​ជា​ថ្នូរ​នឹង​ការ​ដោះ​លែង ក្រោម​ហេតុផល​ថា ជន​រង​គ្រោះ ទាំងនោះ​ជា​អ្នក ប្រើប្រាស់​គ្រឿងញៀន​ ។

រឿង​នេះ​បាន​កើត​ឡើងជា​យូរ​មក​ហើយ តែ​ទើបតែ​មានការ​ភ្ញាក់ផ្អើលខ្លាំង​ក្នុង​រយៈពេល​ចុង​ក្រោយ​នេះ បន្ទាប់​ពី​មាន​ផ្សាយ​លើ​បណ្តាញ​សង្គម​ហ្វេ​ស​បុក ​និង​បណ្តាសារ​ព័ត៌មាន​អន​ឡាញ​ ចុះផ្សាយជាបន្តបន្ទាប់ ព្រោះថា​ជា​ញយ​ដង តែងតែ​ប្រទះ​ឃើញ មាន​សកម្ម​នេះ​បាន​កើតឡើង​នៅ​តំបន់​បឹង​កក់ ជា​ពិសេស​ព្រំប្រទល់​ខណ្ឌទួលគោក និង​ខណ្ឌដូនពេញ​ ដោយ​មនុស្សមួយ​ក្រុម ខ្លះ​មាន​ឯកសណ្ឋាន​ជា​សមត្ថកិច្ច​​ ថែមទាំង​មាន​ប្រដាប់​អាវុធ និង​ខ្លះ​ស្លៀកពាក់​ស៊ី​វិល បាន​ចាប់​ប្រជាពលរដ្ឋ ជា​ពិសេសយុវជន​ដែល​ធ្វើ​ដំណើរ​នៅ​ក្នុង​តំបន់​នោះ​ដើម្បី​ជំរិត​ទារប្រាក់​ ដោយ​ចោទ ពួក​គេ​ថា ជា​អ្នក​ប្រើប្រាស់​គ្រឿងញៀន ទាំង​ដែល​ពួក​គេ​មិន​បាន​ប្រើប្រាស់​ទាល់តែ​សោះ ៕