បង្ក្រាប ​ករណី​ជួញដូរ​គ្រឿងញៀន​ឆ្លងដែន ​ឃាត់​ជនជាតិ​ថៃ​២​នាក់ ​រួមជាមួយថ្នាំញៀន​ជិត​៨​គីឡូក្រាម

53

ឧត្តរមានជ័យ​ ៖ ​បុរស​ជនជាតិ​ថៃ ២​នាក់ ត្រូវ​បាន​កម្លាំង​មន្ទីរ​ប្រឆាំង​បទល្មើស​គ្រឿងញៀន​ឃាត់ខ្លួន ពាក់ព័ន្ធ​ករណី​ជួញដូរ​គ្រឿងញៀន​ឆ្លងដែន​ពី​ថៃ​មក​កម្ពុជា​ ជាមួយ​នឹង​​​ថ្នាំញៀន​ជិត​៨​គីឡូក្រាម។

មន្ត្រី​នគរបាល​នៃ​មន្ទីរ​ប្រឆាំង​បទល្មើស​គ្រឿងញៀន​ប្រាប់​ឲ្យ​ដឹង​ថា លោក​វរសេនីយ៍ឯក យិន បញ្ញា​រិ​ទ្ធ នាយករង​មន្ទីរ​ប្រឆាំង​បទល្មើស​គ្រឿងញៀន កាលពី​ថ្ងៃទី ១០ ខែធ្នូ ឆ្នាំ​២០១៩ វេលា​ម៉ោង ១៥ និង​១០​នាទី ​បាន​ដឹកនាំ​កម្លាំង​ជំនាញ​នៃ​មន្ទីរ​ប្រឆាំង បទល្មើស​គ្រឿងញៀន (​ក​៩) ​​បើក​កិច្ចប្រតិបត្តិការ​បង្ក្រាប​ករណី​ជួញដូរ​គ្រឿង ញៀន​ឆ្លងដែន​ពី​ថៃ​មក​កម្ពុជា​(​ឆ្លងកាត់​តាម​ច្រកព្រំដែន​អូ​ស្មាច់)។

ប្រតិបត្តិការ​នេះ​ ដោយមាន​ការ​ចូលរួម​ពី​កម្លាំង​ជំនាញ នៃ​ស្នងការដ្ឋាន​នគរបាល​ខេត្ត​ឧ​ត្ត​រ​មានជ័យ ក្រោម​ការសម្របសម្រួល​ពី​លោក ប៉េង ម៉េង​គ័ង ព្រះរាជអាជ្ញារង នៃ​អយ្យការ​អម​សាលាដំបូង ខេត្ត​ឧ​ត្ត​រ​មានជ័យ នៅ​ចំណុច ផ្លូវជាតិ​លេខ​៦៨ ស្ថិតនៅ​ភូមិ​អូរ​ពក ឃុំ​កូន​ក្រៀល ក្រុង​សំរោង​ខេត្ត ឧត្ដរមានជ័យ។ ជា​លទ្ធផល​ឃាត់ខ្លួន​ជនសង្ស័យ ០២​នាក់ ទី​១. ឈ្មោះ ប្រាក់ ស៊ុប ភេទ​ប្រុស ជនជាតិ​ថៃ កើត​ថ្ង​ទី​២០/១០/១៩៨៦ មុខរបរ​កសិករ​ធ្វើស្រែ កាន់​លិខិតឆ្លងដែន​លេខ AB2613142 រស់នៅ​ភូមិ​ប្រាសាទ ស្រុក​កាប់​ជើង ខេត្ត​សុរិន្ទ ថៃ និង​ទី​២. ឈ្មោះ ណាត ថា​ភុ​ន ភេទ​ប្រុស អាយុ ៤២​ឆ្នាំ ជនជាតិ​ថៃ មុខរបរ​ជាង​ជួសជុល​រថយន្ត រស់នៅ​ភូមិ​ប្រាសាទ ស្រុក​កាប់​ជើង ខេត្ត​សុរិន្ទ ប្រទេស​ថៃ។ ការ​ឃាត់​ខ្លួន​នេះ កម្លាំង​បាន​ចាប់​យក​វត្ថុតាង​​រួម​មាន ៖ សារធាតុ​ញៀន​ប្រភេទ​មេ​តំ​ហ្វេ​តា​មីន (ICE) ចំនួន ០៨​ដុំ​ធំ ស្មើនឹង​ទម្ងន់ ៧.៩៧៩,៥៦​ក្រាម និង​រថយន្ត ០១​គ្រឿង។

បច្ចុប្បន្ន​ជនសង្ស័យ និង​វត្ថុតាង​ចាប់យក​ខាងលើ សមត្ថកិច្ច​ជំនាញ នៃ​មន្ទីរ​ប្រឆាំង​បទ ល្មើស​គ្រឿងញៀន ប្រគល់​ជូនទៅ​ស្នងការដ្ឋាន​នគរបាល​ខេត្ត​ឧ​ត្ត​រ​មានជ័យ ដើម្បី​កសាង​សំណុំរឿង បន្តទៅ​តុលាការ​តាម​នីតិវិធី៕

 

 

 

 

 

 

 

ប្រភព kampucheathmey