ក្តៅៗ! សមត្ថកិច្ច​ថៃ​ឃាត់​ជនជាតិ​ចិន៤នាក់​ នៅ​ព្រលា​នយន្តហោះ​សុវណ្ណភូមិ សង្ស័យ​ផ្ទុក​ជំងឺ​ផ្តាសាយ​ចម្លែក​

165

សមត្ថកិច្ច​ជំនាញ​ថៃ​ នៅ​ព្រលា​នយន្តហោះ​សុវណ្ណភូមិ ​ក្នុង​ទីក្រុង​បាងកក​ បាន​ឃាត់ខ្លួន​ជនជាតិ​ចិន​បួន​នាក់​ដែល​ធ្វើដំណើរ​ចេញពី​ក្រុង​វូ​ហាន​(Wuhan​) ជា​កន្លែង​ដែល​កំពុង​ឆ្លង​រាលដាល​ជំងឺ​ផ្តាសាយ​ចម្លែក​មួយ​ដែលគេ​កំណត់​ថា​ H3N2​។

អគ្គនាយក​ដ្ឋាន​ត្រួតពិនិត្យ​ជំងឺឆ្លង​នៃ​ក្រសួងសុខាភិបាល​ថៃ​ លោក​ Suwanchai​ Wattanayingcharoenchai​ ថ្លែង​ថា​ ក្នុងចំណោម​ជនជាតិ​ចិន៤នាក់​ដែល​សង្ស័យ​មាន​ផ្ទុកមេរោគ​ចម្លែក ​H3N2​ គឺ​មន្ត្រី​ជំនាញ​អាច​បញ្ជាក់​បាន​ថា​ ក្មេងប្រុស​អាយុ៣ឆ្នាំ​មិន​មាន​ផ្ទុកមេរោគ​ទេ​។ ចំណែក៣នាក់​ផ្សេងទៀត​ សមត្ថកិច្ច​ជំនាញ​បន្ត​ស្រាវជ្រាវ​។ នេះ​បើ​តាម​ការ​ចុះផ្សាយ​របស់ ​Travel​ Daily​ Media​។

ចាប់តាំងពី​មានការ​ផ្សព្វផ្សាយ​ពី​មានការ​ផ្ទុះ​មេរោគ​ចម្លែក​ដែល​អ្នក​វិទ្យាសាស្ត្រ​មិនទាន់​អាច​កំណត់​បាន​នៅក្នុង​ប្រទេស​ចិន​នេះ​ រដ្ឋាភិបាល​ថៃ​ចាប់ផ្តើម​បន្ថែម​មន្ត្រី​ជំនាញ​ និង​ឧបករណ៍​ ដើម្បី​ត្រួតពិនិត្យ​មេរោគ​នេះ​នៅ​ព្រលា​នយន្តហោះ​សុវណ្ណភូមិ​ ដន​មឿង​ ឈាង​ម៉ៃ​ និង​នៅ​ព្រលា​នយន្តអន្តរ​ជា​តិ​ហ្វូ​កេត​។ ការ​ត្រួតពិនិត្យ​ផ្តោត​សំខាន់​អ្នកធ្វើ​ដំណើរ​ពី​ប្រទេស​ចិន​។

នាយកដ្ឋាន​ត្រួតពិនិត្យ​ជំងឺឆ្លង​របស់​ថៃ​ បាន​ណែនាំ​ដល់​អាជ្ញាធរ​មានសមត្ថកិច្ច​ថា​ ចំពោះ​អ្នកធ្វើ​ដំណើរ​ពីទី​ក្រុង​វូ​ហាន​ ដែល​មាន​អាការៈ​ ក្តៅ​ខ្លួន​ ក្អក​ ឈឺបំពង់ក​ តឹងច្រមុះ​ ស្ងួតក​ ក្នុងរយៈ១៤ថ្ងៃ​ គឺជា​សញ្ញា​ប្រកាស​អាសន្ន​ដែល​ត្រូវ​រាយការណ៍​ឱ្យ​មន្ត្រី​ជំនាញ​ជំងឺឆ្លង​ត្រួតពិនិត្យ​បន្ទាន់​។

មេរោគ​ចម្លែក​នៅក្នុង​ទីក្រុង​វូ​ហាន​ ប្រទេស​ចិន​នេះ​ អ្នក​វិទ្យាសាស្ត្រ​មិនទាន់​កំណត់​អត្តសញ្ញាណ​បាន​នៅឡើយ​ ហើយ​វា​បាន​ធ្វើ​ឱ្យ​មនុស្ស​ចំនួន៥០នាក់​ធ្លាក់ខ្លួន​ឈឺ​ ហើយ​ក្នុង​នោះ៧នាក់​កំពុង​ស្ថិតនៅ​ក្នុង​ស្ថានភាព​ធ្ងន់ធ្ងរ​។

បញ្ហា​មេរោគ​ចម្លែក​នៅក្នុង​ប្រទេស​ចិន​នេះ​ ត្រូវ​បានវិស័យ​សុខា​ភិបាលនៅ​តាម​ប្រទេស​នានា​លើ​ពិភពលោក​កំពុង​យកចិត្ត​ទុកដាក់​ ហើយ​ប្រកាស​ឱ្យ​មន្ត្រី​ជំនាញ​របស់​ពួកគេ​បង្កើន​ការ​ប្រុងប្រយ័ត្ន​ខ្ពស់​។

មូលហេតុ​ដែល​នាំ​ឱ្យ​រដ្ឋាភិបាល​ចិន​ក៏ដូចជា​ប្រទេស​ផ្សេង​ៗទៀត​លើ​ពិភពលោក​មានការ​ព្រួយបារម្ភ​លើ​បញ្ហា​នេះ​ ដោយសារ​មាន​បទ​ពិសោធ​នៃ​ការ​ឆ្លង​រាលដាល​មេរោគ​ចម្លែក​កន្លងមក​ បាន​សម្លាប់​មនុស្ស​យ៉ាង​ឆាប់​រហ័ស​ ហើយ​ពិបាក​ទប់ស្កាត់​។

ដូចជា​ឆ្នាំ២០០២​ មាន​ករណី​ឆ្លង​រាលដាល​ជំងឺ​សា​ យ៉ាង​ឆាប់រហ័ស​នៅ​ប្រទេស​ចិន​ ដែល​ធ្វើ​ឱ្យ​មនុស្ស៨០៩៨​ នាក់​ធ្លាក់ខ្លួន​ឈឺ​ ហើយ​ក្នុង​នោះ៧៧៤នាក់​ស្លាប់​។ មិនមែន​នៅ​ចិន​ទេ​ ហើយក៏​មិន​មានតែ​ជំងឺ​សា​មួយ​មុខ​នេះ​ដែរ​គឺ​ នៅ​លើ​ពិភពលោក​តែងតែ​លេចចេញ​ជំ​ងឺ​ប្លែក​ៗឆ្លង​បន្តបន្ទាប់​ ហើយក៏​បាត់​ទៅវិញ​ រួច​ក៏​មាន​ជំងឺ​ថ្មី​កើតឡើង​ទៀត​៕

ប្រភព vodkhmer